HTC mun tilkynna nýja One símann þann 25. mars n.k. og hafa myndir nú lekið af símanum. Evleaks birti í dag fjölmiðlamyndir af nýja One símanum á Twitter síðu sinni og lítur allt út fyrir að þær séu alvöru.
Það vekur strax athygli að síminn er gulllitaður og er mjög svipaður að lit og iPhone 5S. Það eru nokkrir aðrir mjög áhugaverðir hlutir eins og 2 myndavélalinsur og dual-led flass. Einnig hefur HTC tekið burtu takkana sem voru á framhlið One símans og virðast nú ætla að nota soft-takka eins og er á Nexus símunum. HTC lagði mikla áherslu á myndavél One símans, en dræmar viðtökur á 4 MP Ultrapixel myndavélinni sem var í þeim síma virðast vera að hafa einhver áhrif. Það verður áhugavert að sjá hvernig myndavélarnar munu virka, en ein ágiskun væri að síminn taki myndir samtímis með mismunandi birtustillingum og skeyti þeim svo saman líkt og er gert með HDR myndatöku.
Það er greinilegt að HTC heldur í það sem vel gekk með One símann eins og stereo-hátalarana og álhönnunina, en virðist vera að taka á því sem síminn var helst gagnrýndur fyrir, eins og myndavélina og takkana að framanverðu. HTC One var að okkar mati mjög góður sími eins og lesa má í umfjöllun okkar. Það verður spennandi að sjá hvernig síminn verður þegar hann kemur út.
Heimild: @evleaks
